Rolf Wilhelm Ytrebø (1915 - 1955)

Etter verneplikt i marinen og utdanning som kvartmeister, hadde Rolf Wilhelm teneste på fleire båtar i Den norske marinen i åra før krigen tok til. Han var både på mineleggjaren “Olav Tryggvason”, oppsynsskipet “Fritjof Nansen” og jagaren “Sleipner”.

I april 1940 var han stasjonert på vaktbåten “Svalbard II” i tredje sjøforsvarsdistrikt (Nord-Norge). “Svalbard II” var utstyrt med ei kanon og involvert i fleire trefningar med tyske soldatar og krigsskip. Skipet var i Gratangen 27. og 28. april 1940 og skaut mot fleire tyske stillingar og forlegninga til soldatane. Skipet skal også ha deltatt i kampane under gjenerobringa av Narvik i slutten av mai 1940. Etter at dei allierte styrkane trakk seg ut av Narvik drog “Svalbard II” nordover og vart overtatt av tyske styrkar i Tromsø 27. juni 1940.

Rolf reiste heim til Sunnmøre og gjekk det neste året på styrmannsskulen i Ålesund. Hausten 1941 var han i Herøy og vart med “Kvalsund” på turen over til Færøyane 6. oktober.

Medan dei andre som kom over med “Kvalsund” stort sett gjekk til handelsflåten, var det naturleg at Rolf med si utdanning og erfaring, på ny fekk teneste som kvartmeister i Den norske marinen. Han var først ei tid ombord i jagaren “Glaisdale” før han i juni 1942 vart overført til “Rosythavdelingen” ved Edinburgh i Skottland. Denne avdelingen vart oppretta i sommaren 1940 og fekk ansvaret for minesveiping. Rolf hadde teneste både på sjefs- og depotskipet “Heimdal” og på fleire av dei norske minesveiparane som var stasjonert i Skottland.

Ei periode frå slutten av 1944 og utover våren 1945 var han på ubåten “Utsira”. Oppgåvene for denne ubåten var oppdrag på norskekysten og angrep på tyske skip. Siste delen av krigen var han på minesveiparen “Børtind” med grad som fenrik.

Rolf kom heim til Norge sommaren 1945 og gifta seg med Ester Vadset. Dei busette seg i Ålesund. Rolf døde alt i 1955, berre 40 år gammal.